Bona proa de sas biancasblue, accudidas accurtzu a su tie break contr’à sa vicecapolista de su girone A
Una proa manna no abbastat a s’Hermaea Olbia, chi gherrat chena timore, ma a sa fine si devet mujare, tres set a unu contr’à sa Valsabbina Millenium Brescia, vicecapolista de su Girone A de sa Serie A2 de sas feminas. Semper insegus in sos primos duos set, sas biancasblue ant binchidu su terzu, perdende a sa fine, a duos passos dae su tie break.
So kO – su segundu intro ‘e domo de cust’annada – costat caru meda, Albese binchet contr’à Montale e si che colat in sesta positzione. Pagu disiperu però. Bonos sinnos in cantu a identidade e bellu giogu, faghent bene isperare pro sa cursa finale chi potet gighere a sa Poule Promotzione.
SA GARA – Guadalupi premiat sa balia de Messaggi, presentendela intro s’istarting six cun Bridi a su palleggiu, Miilen e Bulaich in banda, Tajè e Gannar in sa mesania e Barbagallo libero. Pro Brescia, invece, b’est Boldini in diagonale cun Obossa, Cvetnic e Pamio in logu 4, Torcolacci e Consoli in mesania cun Scognamillo libero.
Passadas sas primas proas de istudiu a paris, sas istrantzas agattant bonas giogadas in mesu e bolant a +4 (10-6). S’Hermaea contat meda subra Bulaich, ma iscradiat a -6 (20-14), tando Guadalupi seberat unu cambiu de diagonale, cun Bresciani e Schirò, chi leant su logu de Bridi e Messaggi. S’isterrida noa carrat problemas a sa lombardas, chi bident su vantaggiu issoro miminende, fintzas a 21-18, ma a sa fine Obossa e Pamio accontzant su barriu issoro giompende a su 25-21, finale.
In su segundu set, sa tuccada de sas sardas est meda lèna. Millenium che pigat su tempus a muru e doppiat sa contra 14-7. In campo si’idet Fontemaggi in logu de Miilen, ma Brescia mantenet frimmu su cumandu (20-12 cun su sinnu de Cvetnic). Sa gara paret tando perdida, ma Hermaea agatat tando sos brios pro torrare in partida, fintzas a su -4 (21-17, muru de Miilen subra Obossa) chi faghet oriolare mastru Beltrami. Ispostu su timeout, sas leonessas tirant sas briglias e tancant sos contos subra su 25-19.
Su terzu game est cussu de sa riscossa hermeina, che proant a fuire (luego 3-0, pustis 9-6). Sa vicecapolista chircat remediu e apparinat a cuota 17. Tando si pesat Bulaich, chi – cun s’ajudu de Schirò – giompent a +3 (22-19). Obossa no s’arrendet e che tratzat sas suas a su vantaggi, inue detzidit ancora sa copia Bulaich-Schirò: Hermaea bolat 27-25 e s’accurtziat in su contu, caentende sa cuntentesa de sa tzente in tribuna.
Su sesteto de domo bi crèt, ma torrat a bruscare su giogu de Torcolacci dae sa mesania, chi guidat sa fùa bresciana subra s’8-3. Tajè e cumpantzas non mollant mancu unu centimetru, e si buffant su vantaggiu de sa contra apparinende a cuota 15. Sa gara s’allumat e si faghet semper pius bilanciada, impretziosida dae s’ifida tra Obossa e Bulaich. Su primu tempo vintzente de Torcolacci sinnat su vantaggiu pro Brescia subra su 24-23. Guadalupi preguntat su timeout, ma s’ace fortunada de sa centrale, c’agabbat su match, lassende ranchidumine in bucca a sas abbilas, chena premiare sa balia donada.
“No est fatzile a ingullire sa fine de su cuartu set – ispiegat mastru Guadalupi – mancari nos est mancadu unu pagu su curaggiu, subra ‘e totu in su servitziu. Aiamus postu remediu e leada s’inertzia, custu nos donat galu pius fele pro su puntu perdidu. Ca da poi no aimus potidu mai ischire comente fit potida anadare a finire in su cuintu set. Devimus donare meritu a sa contra: in su primu set amus sueradu meda pro resessire a sighire altèsa e sa lestresa de su giogu issoro. Ant ischidu puru mudare totu sas solusciones in attacu e in sa battidura. Nois semus tuccados unu pagu cun su frenu a manu tiradu, pustis amus agatadu s’animu e su tempus nostru. So cuntentu de sa proa donada, tzeltu chi a su nessi unu puntu no nos aiat fatu male pro nudda. A donzi modu cun custa proa creschet s’istima in nois matessi, ch’est cosa bona pensende a su chi nos isettat in su tempus bennidore”.
Gasì narat invece Alessandro Beltrami, mastru de sa Valsabbina Millenium Brescia: “Ischiamus bene chi a parte Sassuolo, niune aiat binchidu tres puntos in custu campu. A donzi modu so cuntentu meda, ca s’iscuadra at agatadu sa balia giusta in sa battida e in sa defesa, rischiande pagu a su bisontzu. In su terzu set Bulaich est’istada mala a parare, e s’Hermaea tota nos at orioladu meda. Nois amus perdidu sa calma e l’amus pagada cara. Su cuartu set puru no est’istadu pro nudda fatzile, cando perdimus su tempus, sa cunfidentzia benit mancu. Amus mantesu sa guida semper innanti e custu nos at ajuadu in su puntu a puntu”.
Hermaea Olbia-Valsabbina Millenium Brescia 1-3 (21-25; 19-25; 27-25; 23-25)
Hermaea Olbia: Messaggi 3, Fontemaggi, Miilen 9, Franchi, Gannar 7, Diagne, Bulaich 22, Bridi 2, Bresciani, Tajè 11, Barbagallo L, Schirò 9. Allenatore: Dino Guadalupi
Valsabbina Brescia: Blasi L, Orlandi, Boldini 4, Consoli 8, Torcolacci 14, Cvetnic 16, Pamio 7, Obossa 31, Munarini, Scognamillo L, Zorzetto, Foresi, Ratti. Allenatore: Alessandro Beltrami
Arbitri: Pescatore e Mannarino
Traduzione di Mario Bua Capitta di Amistade
