Sas sardsas perdent intro ‘e domo in tres set: Omag che colat gratzias a a sos 16 puntos de Bolzonetti
Una bona proa, a mamentos pagu abista, lassat s’Hermaea binchida in su Geopalace, dae s’Omag-Mt San Giovanni in Marignano, in su terzu turnu de sa Pool Promotzione, de s’A2 de sa Feminas. Tres set a zero (25-22, 25-20, 25-22 ) est su finale in contu de sas romagnolas, chi ant devidu suerare e no pagu, pro agabbare sa resistentzia de sas olbiesas.
SA GARA – Hermaea, chi devet faghere ancora a mancu de Schirò, tuccat cun Bridi a su palleggiu, Messaggi opposto, Bulaich e Miilen in banda, Ganner e Taje in sa mesania cun Barbagallo libero. S’Omag-Mt terza iscuadra de sa classifica, presentat Turco in regia, Perovic opposta, Bolzonetti e Rachkovska in posto, Parini a Babatunde in sa mesania e Caforio Libero. Coladu su puntu a borta paris de s’incomintzu, sas romagnolas si ‘antant de sa proa manna in sa bàttida de Parini e giompent a 14-7 (atacu vintzente de Perovic). Hermaea no est meda cuncorda e sighit a currere sa remuntada: Messaggi ponet a terra su -3 fatende gasì oriolare su mastru istrantzu Barbolini, chi preguntat su timeout. Sa cursa de sas biancasblue no isponet e giompet a sa colada 22-21, balantzada gratzias a sa faddina de s’ex Babatunde. A ajuare Omag tando bi pensat sa balia de Rachkovska, chi donat a s’iscuadra sua sa boccia set, subra su 24-22. Bolzonetti profitat e cund’unu blockout tancat su contu de su set.
Su segundu partziale sighit s’andala de su primu, ma coladas sas primas giogadas, Hermaea ruet 11-5 (primu tempus de Babatunde), pusti torrat a faghet a timire San Giovanni In Marignano, accurtziendesi a su -1, postu a terra dae Bulaich (19-18). Tando puru in su mamentu pius caentadu, sas istrantzas resessint a covecare s’andala: sos ace de Rachovska e Saguatti, abberint s’aidu a s’Omag, chi binchet su segundu set puru, pustis de s’atacu out de Miilen. Cumbinchidas de unu possibile recuperu, sas herminas tuccant metzus meda in su terzu set: su muru de Bulaich balet su +6 (13-7), chi però no abbastat a ch’imbolare a terra s’atza de sa contra, chi bellu a bellu recuperant fintzas a s’apparinada a cuota 18, sinnada dae sa matessi opposta montenegrina. Semper pius caentadu su finale, inue sas olbiesas penant s’intrepetu de duas giamadas arbitrales, sinnadas dae meda dubiosidade ( pius de totu un atacu out de Bulaich, ch’at donadu su 23-21 a Omag) e pesant sa bandela de sa resa subra su 25-22, sinnadu Bolzonetti.
Enrico Barbolini, mastru de s’Omag, narat:”Ischiamus bene chi no est fatzile binchere inoghe, connoschimus bene su valore de Olbia e sa balia de su giogu issoro, capatzu de varias cumbinadas e bene amus fatu a no perdere mai sa patzientzia. Fato sos complimentos mios a Olbia e a sas mias puru, pro aere achividu custa binchida”.
Dino Guadalupi, mastru de s’Hermaea narat:”Sa bona atza de s’iscuadra nostra, no semper at connottu su metzus seberu tecnicu – ispiegat – San Giovanni at miminadu su rischiu cun meda intellighentzia, cando nois amus penadu su muru de sa contra. Amus fatu fadiga meda cun su muru de defesa. Male semus puru tuccados in su cambiu boccia: aimus devidu essere pius balentes in su seberu de sos colpos e pius attraggiados in sa sighida de s’atzione. Pro pius de unu set e mesu l’amus fatu pagu, semus resessidos a remediare in calchi break, inue sa contra at meda penadu. Sa cosa ‘ona est chi s’iscuadra est creschida ‘ene in caminu, agatende bonu tempus. Amus gherradu ‘ene su terzu, ma a sa fine, forsis nos est mancadu unu pagu ‘e curagiu”.
Traduzione di Mario Bua Capitta di Amistade
