Sas piseddas olbiesas donant una proa balente e aggabbant sa gara in battor set, còntra un’iscuadra fraigada pro bìnchere su girone.
Sa tuccada bisada pro s’Hermaea Olbia. In su Geopalace bìnchet e balantzat tres puntos, còntra s’Esperia Cremona, assotziu c’abbaidat a su cabu ‘e subra de sa serie A2 ‘e sa volley de sas feminas.
Proa balente pro sas àbbilas de Taulara, chi coladu su primu partziale, gratzias a una remuntada, ant remediàdu una gara de ammentare, isposta in battor set. Pro sas àbbilas andant mentovadas sas proas de Alice Trampus e Naomi Ngolongolo, tratzadas dae sa guida geniosa de Laura Pasquino e dae s’esperièntzia de Laura Partenio.
S’scuadra lombarda at meda penàdu sas faddìnas in sa bàttida e sa die pagu balente de s’opposto Veronica Taborelli. Bene meda sunt andadas Modesti cun sa Munarini in sa mesania e Francesca Parlangeli in segunda linea.
SA GARA – Pagu cumbìnchida sa tuccada, tando bellu a bellu s’Hermaea fùit a +4, gratzias a su muru vintzente de Partenio (15-11). Tando su mastr’istrantzu Zanelli giamat su timeout e donat atza noa a sas piseddas chi apparinant a 15, cun Arciprete. Munarini e Modesti guidant sa fùa, tancada cun duos puntos, unu fatu a s’àteru sinnados dae Taborelli, pro su 25-20 finale.
S’Hermaea no perdet s’animu e sighit a giogare cun balia manna, in su segundu set puru. Ngolongolo e Trampus faghent suerare sa defesa istrantza, ch’iscradiat in-segus 15-10. Zanelli preguntat tando ajudu a sa panchina, cun Felappi e Zorzetto, chi falant in campu, ma custa olta s’istoria no mudat: sas àbbilas de Taulara giogant cun atza e ischire, fintzas a giompere a su 22-16. Tando Cremona si pesat a sa ritza e torrat in gara, accurtziendesi a su -3 (22-19). Ma bi pensat Trampus a leare s’iscuadra in manu e a apparinare sos contos.
Su sesteto de mastru Guadalupi bogat tota sa balia sua e bolat chena pasu in su terzu set, bìnchende 25-18, tratzadas dae Trampus, bene ajuada dae sa capitana Partenio.
Meda pius gherradu su cuartu set, cun Cremona c’agatat pius logu in attacu e si che colat a punt’innanti 15-14. Tando Hermaea si torrat a leare s’inertzia cun Partenio, penende pro sa furriada de sa còntra. In su punt’à puntu finale, sa biancasblue averguant bene sa gara e l’ispònnent, cu s’attacu vintzente de Kogler, pro su 25-22 finale.
Mastru Guadalupi narat:”Oe nois no potiamus immaginare cust’andamèntu. Cremona at fatu bene meda in s’annu coladu, e at giogadu una pre season longa meda. In pius aiat bìnchidu sa prima gara còntra Busto Arsizio. Toccat semper torrare a pè in terra: semus solu a s’incomintzu, e bene amus fatu a faghere fruttare s’occasiòne donada dae sa còntra, resessende a donare valòre a cantu imparadu intro ‘e chida”.
Mario Bua Capitta, Amistade
