Vintzentes a su tie break sas àbbilas de Taulara, tratzadas dae Bulaich (22 puntos) ma fintzas dae sa balia de Messaggi
Un’àtera manna iscradiat in su fortificadu de su Geovillage. In sa gara de intro ‘e chida ‘e sa Serie A2 de sas feminas, Hermaea Olbia no donat nudda a sa vice capolista Futura Giovani Busto Arsizio, colada in sa remontada de su tie break gratzias a una proa de importu mannu.
Binchidu su primu set 25-20, sas biancasblue sunt devidas bennere a pàre cun sa balia de sas bustocche, chi tratzadas dae s’opposto Zanette, ant achividu sa binchida de su segundu e de su terzu partziale (in contu de 25-21 e 25-23). In fatu est puru giompidu su cabu de sas abbila de Taulara, capata de apparinare su contu (25-23) e pustis cumprire sa colada, in su cuintu set (15-10).
Manna sa proa de Bulaich (22 punti) e de Miilen (16), ma unu mentovu ispeciale devimus donare a Glenda Messaggi, presentad in su sestetto titolare dae su primu set e capatza de mudare s’andamentu cun giogadas detzisivas.
SA GARA – Hermaea presentat su solitu starting six: Bridi a su palleggio, Schirò opposto, Miilen e Bulaich in logu 4, Tajè e Gannar in sa mesania e Barbagallo libero. Busto Arsizio, bennida dae duas binchidas una fatu a s’àtera, s’opponet cun Balboni in diagonale, Zanette, Member-Meneh e Arciprete in banda, Tonello e Botezat in sa mesania cun Mistretta libero.
Bona sa tuccada de sas biancasblue, chi giogant chena oriolu e torrant insegus donzi attacu a sa contra. Sas duas iscuadras apparinant a 13, pustis s’Hermaea fùit a +3 cun s’ace de Gannar (17-14). Amadio impitat su timeout, ma sa fùa olbiesa, leat semper pius logu: su servitziu vintzente de Tajè printat su +5 (24-19), Busto annullat sa prima boccia-set ma Bulaich tancat subra su 25-20, donende a sas suas su primu partziale.
L’Hermaea giogat bene puru a incomintzu de su segundu set (subitu 5-1 cun su block out agatadu dae Bulaich). Custa orta però Busto no perdet tempus e apparinat a 12 cun Zanette e pustis si che colat a 16-15, frimmadu dae Arciprete. Sas istrantzas leant tando sa guida fintzas a sa fine, cumprende su 25-21 cun Zanette.
Bilanciadu puru su caminu de su terzu game, cun sas iscuadras chi si la giogant puntu a puntu, fintzas a su 22 paris, cando Zanette agatat unu pretziosu muru vintzente e Tonello isponet s’opera cun duos puntos unu fatu a s’àteru in contu de sas lombardas (25-23).
Sas hermeinas no si lassant oriolare e sighint a giogare con curaggiu pro sa gara intrea. Passada un àtera fase pagu segura, sas isolanas si che colant innanti, gratzias a un attacu in foras de Arciprete: est su puntu de su 15-14, e dae incue naschet su tempus de su vantaggiu pintadu biancublue, con 8 puntos unu fatu a s’àteru chi giompent a su 23-14. Detzisiva tando una faddina manna in su turnu de sa battidura de Glenda Messaggi, chi cun tres ace e atteras giogadas vintzentes accumpantzat sas suas accutzu a una noa apparinada in contu. Subra su +9, però, accudit su “braccino” curtzu: Busto si torrat a accurtziare a passitos minores cun Arciprete e Zanette sas pius balentes e giompet a su -1 (24-23). Ispostu su timeout de Guadalupi, però, s’Hermaea si liberat dae onzi oriolu e si leat cun Bulaich su puntu chi carrat nùscu de liberazione (25-23).
Profitende de s’animu ‘onu, s’Hermaea isterret bene su cuintu set puru (subitu 3-1 cun su lungolinea de Bulaich). Sas istrantzas suerant pro mantennere su tempu, e a su cambiu campu sunt galu insegus (8-6). In su finale b’at paga istoria: Bulaich e cumpantzas ant àtteros brios e s’istejant attesu, fintzas a cando si leant sos duos mertitados puntos cun su 15-10 postu in terra dae Messaggi, protagonista manna de sa die.
“Primu zèlu oe fit de donare una proa de unidade – narat su mastru de s’Hermaea Dino Guadalupi – custu est’istadu fatu, paris cun s’impreu de sa calidade. S’iscuadra at apidu s’animu impitadu pro si la giogare chena timore contra un’scuadra de livellu comente Busto, pontzende a frutu donzi occasione chi sa gara nos at donadu. Cust’animu nos at ajuadu a abbarrare semper in partida e gratzias a custu sentidu amus achividu su resultadu. Messaggi? S’intrada sua in campu at ‘attidu bene meda in Como puru, mancari sa gara fit divessa. Peruna giogadora binchet a sa sola, ma s’animu ajuat e cussu de Glenda l’at fatu ‘ene. At giogadu cun balia manna, detzidende de seguru unu set. Domenica nos tocat un’àtera contra manna, comente Brescia, tribagliamus pro mantennere biu su matessi animu”.
“Oe amus giogadu una partida fea – narat su mastru de sa Futura Giovani Daris Amadio – in campu amus bidu tropu faddinas e confusione. Fato sos complimentos mios a Olbia, chi at giogadu una partida galana, in unu mamentu pagu fatzile de s’annada issoro. Ischiamus chi fit unu campu complicadu, ma cun totu custo no semus resessidas a mantennere sa conca libera. Pensamus galu tropu pagu a su giogu de iscuadra. S’Hermaea at propostu percentuales discretas in attacu e in battidura, e at apidu su contributu mannu de Messaggi. Nois devimus tribagliare meda subra su metzoru de sa mentalidade”.
Hermaea Olbia-Futura Giovarni Busto Arsizio 3-2 (25-20; 21-25; 23-25; 25-23; 15-10)
Hermaea Olbia: Messaggi 12, Fontemaggi, Miilen 16, Gannar 8, Diagne, Bulaich 22, Bridi 6, Bresciani, Tajè 12, Barbagallo L, Schirò 2. Allenatore: Dino Guadalupi
Busto Arsizio: Venco, Milani, Fiorio 5, Badalamenti, Balboni 5, Mistretta L, Morandi L, Tonello 16, Zanette 28, Arciprete 14, Botezat 11, Pandolfi, Member-Meneh 1. Allenatore: Daris Amadio
Arbitri: Adamo e Giulietti
