In s’urtima gara intro ‘e domo de su 2022 sas abbila de Taulara no faddint: Daniela Bulaich sa pius balente
Sa chistione de su Geopalace no mudat: no si tocat su campu de s’Hermaea, chi in tres binchet s’Oro Cash Lecco in sue undighi de su girone A2 de sas feminas (26-24, 25-20, 25-22). Una binchida nodida, ch’abberit sa janna de sa Coppa Italia, inue sas abbila de Taulara abbojant Talmassons in su segund’annu fatu a s’àteru. Balente Daniela Bulaich cun 17 puntos e meda giogadas c’ajuant a mujare sa resistentzia de una contra semper in partida.
SA GARA – Mastru Guadalupi potet presentare torra Bridi in su logu sou: umpare a s’opposto Schirò, in mesania Tajè e Gannar, sas ischiaciatrices Bulaich e Miilen, libero Barbagallo. Lecco animosa, pustis de sa binchida a su tie break contr’à Trentino, presentat Rimoldi in diagonale, Bassi, Albano e Piancetini in sa mesania, Lancini e Zingari in banda e Bonvicini libero.
Sas istrantzas tuccant de bona lèna e giompent a su +3 (8-5), sa gara abbarrat semper meda bilanciada: sas iscuadras caminant umpare fintzas a sa fine, cando Lecco fuit innantis (21-20). Hermaea tando torrat in gara e proat a la tancare (24-21), ma sa contra no est galu binchida e che furriant insegus tres mach boccias. Accudidas a su vantaggi, sas biancasblue agattant sa balia preguntada pro l’agabbare, subra su 26-24 cun sa parallela de Miilen.
In su segundu set sas sardas guidant dae s’incominzu. Sa istrantzas no resessint però a punghere e che ruent insegus fintzas de 7 puntos. Milano accontzat su sesteto sou chi furriat in gara fintzas a che colare sas sardas 20-19. Tando torrat cun balia manna s’iscuadra olbiesa chi tancat su set cun duos puntos unu fatu a s’àteru sinnados dae Bulaich (25-20).
Tajè e cumpantzas sunt tando detzisas a la tancare in presse. Lecco torrat però donzi colpu insegus e su terzu set torrat a sa lutta chena pasu, caminant umpare fintzas a sue 20, pustis Hermaea no abbaidat pius a niune: in una die de ammentare pro sos colore biancosblue bi pensat s’argentina Daniela Bulaich, capatza de sa diagonale chi printat su 25-22 finale.
“Isetaiamus una gara gherrada e gasì est’istadu – cummentat Mastru Dino Guadalupi – ischiamus chi Lecco fit pronta a impedire donzi proa de accelleratzione. Amus achividu in manera pius nodida che in sas urtimas garas. Amus giogadu donzi puntu, bene abbistos, puntu a puntu, chena perdere mai su controllu de su giogu. B’at apidu cosas c’amus cumpridu cun bona tecnica, àteras chi devimus galu metzorare. Potet essere chi in su terzu set amus perdidu unu pagu de “pulitzia” in su faghere, ma semus resessidos a abbarrare sabios e cuss’est de importu mannu pro nois. Ite potimus narrere de su girone de andada? In contu de puntos no nos potimus lamentare. Semus in Coppa Italia: no fit nudda seguru e sa cosa no est de pagu contu, semus meda contento de s’acchividu. Carchi orta no semus resessidos a donare continuidade a sa balia: cun sa furriada de su girone mi auguro meda de giompere a un’identidade pius nodida”.
Traduzione di Mario Bua Capitta , Amistade
