Sas olbiesas si la giogant paris, in su Pala Costa, ma a sa fine si devent arrendere. Pesudos sos 22 puntos de Bulovic
Pro sa segunda partita infatu, su tie break at agabbadu s’isperu de s’Hermaea, binchida in su Pala Costa, dae s’Olimpia Teodora Ravenna (25-17, 23-25, 25-17, 22-25, 15-11, sos partziales). Sas biancosblu ant fatu bidere metzoru, paragonadu a sa partida intro ‘e domo cun su Sant’Elia, gioghendesila semper umpare, guasi totu su match. In su finale tribuladu, però, at dessitzu su colpu dadu sas meres de domo, ajuadas dae sa balia de Bulovic (top scorer de sa isfida cun 22 puntos).
SA GARA – In s’Hermaea torrat titolare sa capitana Caforio, paris cun sa palleggiatrice Allasia, sa contra cun Renieri, sas bandas cun Miilen e Maruotti, in sa mesania Barbazeni e Babatunde.
S’Olimpia Teodora, mancat de duas titolares comente Fricano e Torcolacci, tucat metzus e cumandat 9-5, cun Pomili. S’Hermaea agatat bona gioghera in sa mesania cun Babatunde, e frenant sa balia romagnola pareggende subra su 14. Sa diagonale lanza de Bulovic, donat animu a sas meres de domo, capate de che torrare a pigare a pius 4 (19-15).
Guadalupi isponet su giogu e seberat duos cambios. Fezzi in su logu 4 e Gerosa in sa mesania. Sas mossas no produint pero su cambiamentu isperadu: a sa fine, difattis Ravenna torrat a fuire e tancat 25-17, cun sa battuta vintzente de Pomili.
Pius de totus sas faddinas mudant sa prima parte de su segundu set. S’Hermaea comintzat su metzoru e custu faghet oriolare Bendandi, giompende a +4, subra su 14-10. S’Olimpia Teodora chircat de sighire sa briglia, ma benit furriada dae unu bellu lungo linea de Maruotti e dae su muru vintzente de Babatunde(19-15). Su segundu atacu però est cussu nodidu, cun sa toccada de s’ex Spinello chi gighet sa partida in paris a 21. Su muru de Salvatori subra Miilen, trazat innantis Ravenna, ma s’Hermaea est mala a domare e agat sa fortza pro che torrare a colare Ravenna, gratzias a su tribagliu de Renieri guida manna de su 25-23 olbiesu.
Ravenna si faghet a bidere a incomintzu de su terzu (4-1), ma bident sa furriada de sas biancasblu, cun s’ace de allasia subra Bulovic. Sas isquadras cumandant paris sa partida infatu. A sa mesania de su set però, s’Olimpia lassant donzi dubiu e torrant a +4, cun su servitziu vintzente de Bulovic, (15-11). In campu s’ident puru Formaggio, giamada in logu de Miilen, Fezzi pro Maruotti e Severin in logu de Allasia. Colzi però crescet su divariu, fintzas a giompere a +7, cund’unu primu tempus galanu, (21-14). Tando s’Olimpia no abbaidat pius insegus, S’Hermaea agatat sa fortza pro annullare duas bocias set, pustis agabbat sa resistentzia, semper 25-17.
S’iscuadra de Bendandi sighit cun animu ‘onu fintzas in su set infatu (subitu 6-2). Sas olbiesas no perdent curagiu e torrant in paris a 11, cun Fezzi. Sa lutta sighit umpare cando giompent 21. Su sesteto de Guadalupi torrat a fuire subra 23-21, cun su muru vintzente de Babatunde, tando su mastru de domo giamat su timeout. Sas herminas torrant in campu pius cumbinchidas e si giogant sa bocia set subra su 24-22, cun su lungo linea de Fezzi. Colzi, infatus, ch’imbolat a foras s’atacu in fast e su tabellone sinnat 25-22 pro s’Hermaea. A detzidere at a essere torra su tie break.
In su cuintu set Salvatori faghet sa boghe russa pro su Ravenna (5-3 e timeout Guadalupi). E s’animu mudat. Renieri si faghet balente a muru e agatat luego su paris.A su cambiu de campu innanti b’est semper s’Olimpia, gratzias a s’atacu out de Fezzi, dae su logu 4. A sa parte finale sas romagnolas si presentant subra su pius 4 (11-7). S’Hermaea bi proat ancora ma su finale accuntant sas meres de domo, cun Guasti chi agabbat su match, pontzende a terra sa bocia de su 15-11.
“De seguru b’est istada sa reatzione chircada – cummentat mastru Guadalupi – pro mala sorte in su primu set semus partidos nervosos e no amus agatadu tempus e calidade in atacu in su fundamentu de sa difesa. Pustis semus resessidos a mudare su trend e tando amus metzoradu sa gioghera nostra. Dae cussu mamentu amus abbertu sa partida, giogada subra carchi break chi ant partidu sos set, mancari in su terzu est miminada sa balia de su servitziu, ajuende gasi sa distribuzione issoro. Devimus resessire a mantenere semper a su matessi livellu sa balia fisica e mentale pro tota sa durada de sa partida, fintzas cando s’aversariu impedit de sighire. Cando custu capitat tribagliamus in armonia cun sas capatzidades tecnicas nostras e cun su bisonzu de fraigare un’identidade comuna. B’at tribagliu meda e tocat de proare intro ‘e tota sa chida”.
Mario Bua Amistade Circolo di Lingua Sarda
